काठमाडौं– बैंकिङ कसुरसम्बन्धी मुद्दामा अदालतले १५ दिनको कैद सजाय सुनाएका एक अभियुक्त ५ महिनापछि पक्राउ परेका छन् ।

सापटी लिएको रकम भुक्तानी गर्नका लागि पैसा नै नभएको खाताको चेक दिएको भन्दै काठमाडौंको मनमैजु घर भएका ५५ वर्षीय प्रभात बिक्रम थापाविरुद्ध अदालतले १५ दिनको कैद सजाय समेतको फैसला सुनाएको थियो ।

थापाले आर्थिक व्यवहार मिलाउनका लागि अर्जुन तामाङबाट ८ लाख ५० हजार रुपैयाँ ऋण लिएका थिए । तर, ऋण तिर्ने बेला थापाले पैसा नभएको सिभिल बैंकको चेक दिएका थिए ।

सिभिल बैंकको पुतलीसडक स्थित शाखाले थापले अर्जुनका नाममा दिएको चेक बाउन्स गरेको थियो । आफूलाई दिइएको चेक बाउन्स भएपछि अर्जुनले बैंकिङ कसुरअन्तर्गत थापाविरुद्ध मुद्दा दर्ता गरेका थिए ।

४ चैत २०७५ मा मुद्दाको फैसला सुनाउँदै पाटन उच्च अदालतले थापाविरुद्ध ८ लाख ५० हजार रुपैयाँ जरिवाना र १५ दिन कैद हुने ठहर गरेको थियो ।

तर, थापा भने अदालतको फैसलापछि फरार थिए । फरार रहेका थापालाई प्रहरीको केन्द्रीय अनुसन्धान ब्यूरो (सिआईबी)ले पक्राउ गरेको हो ।

पक्राउ परेका थापालाई फैसला कार्यान्वयनका लागि काठमाडौं जिल्ला अदालतमा उपस्थित गराइएकोमा अदालतले केन्द्रीय कारागार सुन्धारा पठाएको सिआईबीले जनाएको छ ।