काठमाडौँ– पाकिस्तानमा यो वर्ष पोलियो विरुद्धको खोप अभियानमा सहभागी १७ जना स्वास्थ्यकर्मीको हत्या भएको छ। पाकिस्तानले मुलुकबाट पोलियो रोग निर्मूल पार्ने प्रयासलाई तीव्रता दिइरहेका बेला यस्तो तथ्य बाहिरिएको हो ।

पाकिस्तानबाट प्रकाशित हुने डन अखबारका अनुसार खासगरी खैबर पख्तुनख्वा र बलुचिस्तान प्रान्तमा स्वास्थ्यकर्मीविरुद्ध आक्रमण भएका छन् । ती क्षेत्रमा सक्रिय लडाकुले बालबालिकालाई पोलियोबाट जोगाउन सक्रिय स्वास्थ्यकर्मीलाई निशाना बनाउने गरेका छन् ।

सन् २०१२ यता लडाकुको आक्रमणमा परि हालसम्म पोलियोविरुद्धको खोप अभियानमा सहभागी १ सय २६ जना स्वास्थ्यकर्मीको ज्यान गइसकेको छ । 

पोलियो खोप अभियान कर्मीमाथि हुने यस्ता आक्रमणका घटनाबाट पाकिस्तानी स्वास्थ्यकर्मीमा भयको वातावरण सिर्जना भएको छ ।