काठमाडौं- भारतीय कम्युनिष्ट पार्टीका महासचिव सिताराम यचुरीको निधन भएको छ । भारतीय सञ्चारमाध्यमहरूका अनुसार यचुरीको बिहीबार ७२ वर्षको उमेरमा निधन भएको हो ।

सीपीएमले जारी गरेको वक्तव्यमा येचुरीको निमोनियका कारण श्वासनलीमा गम्भीर संक्रमण भएर यचुरीलाई उपचारका लागि नयाँदिल्लीस्थित एम्स अस्पतालमा भर्ना गरिएको थियो।

समाचार एजेन्सी पीटीआईका अनुसार ज्वरो आएपछि अगस्ट १९ मा येचुरीलाई एम्समा भर्ना गरिएको थियो । त्यसपछि उनलाई आईसीयूमा सारिएको थियो ।

७३ वर्षीय येचुरीको मोतियाबिन्दुको पनि शल्यक्रिया गरिएको थियो । अगस्ट २२ मा उपचाररत येचुरीले भिडियो सन्देशमार्फत् पश्चिम बंगालका पूर्वमुख्यमन्त्री बुद्धदेव भट्टाचार्यलाई श्रद्धाञ्जली दिएका थिए ।

उनी अस्वस्थ भएपछि नयाँदिल्लीस्थित एम्स अस्पतालको आईसीयुमा भर्ना भएका थिए । उनले विद्यार्थीकालबाटै राजनीति सुरु गरेका थिए । उनी भारतमा आपत्काल लागु गर्दा पटक पटक पक्राउ परेका थिए ।

यचुरी नेपाल-भारत सम्बन्धका जानकार नेतामध्ये एक थिए । उनले नेपालका विभिन्न कम्युनिष्ट पार्टीका महाधिवेशनमा अतिथिका रुपमा सहभागिता जनाएका थिए ।

यचुरी पछिल्लो ३२ वर्षदेखि सीपीएम पोलिटब्यूरो सदस्य थिए । उनी सन् २०१५ देखि पार्टीको महासचिव भएका थिए। उनी संसदीय राजनीतितर्फ सन् २००५ देखि २०१७ सम्म भारतको राज्यसभा सदस्य भएका थिए ।