काठमाडौं– गत असार ३० गते तेस्रो पटक प्रधानमन्त्रीमा नियुक्त भएका केपी शर्मा ओलीले संघीय सरकारका मन्त्रीहरूसँग हालसम्मको कामको समीक्षा गर्ने भएका छन् ।

बिहीबार दिउँसो साढे २ बजे सिंहदरबारमा प्रधानमन्त्री ओलीले संघीय सरकारका सबै मन्त्रीहरू सहभागी हुने गरी समीक्षात्मक बैठक राखेका छन् ।

उक्त बैठकमा ओलीले  सरकार बनेको दुई महिनायताको कामको समीक्षा गर्न लागेका हुन् । ओलीले त्यहीँ मन्त्रीहरूसँग उनीहरूको कार्यप्रगति विवरण पनि लिँदैछन् ।

यो बैठकमा ओलीले सबै मन्त्रीसँग कार्यसम्पादन सम्झौता पनि गर्ने भएका उनको सचिवालयले जानकारी दिएको छ ।

सचिवालयका अनुसार बिहीबार दिउँसो प्रधानमन्त्री ओलीले संघीय सरकारका सबै मन्त्रीहरूलाई कार्य सम्पादन सम्झौताका लागि सिंहदरबार बोलाएका हुन् ।

मन्त्रीहरूले तयार गरेको कार्ययोजनामा प्रधानमन्त्री ओलीले सम्झौता गर्ने भएका छन् । त्यसका आधारमा उनले मन्त्रीहरूलाई सम्भावित योजनासहित काम तोक्ने भएका छन् ।