काठमाडौं–सिनामंगलमा भएको दुर्घटनामा १ को मृत्यु भएको छ । ५ जना घाइते भएका छन् । तीव्र गतिमा रहेको ट्रिपरले ३ मोटरसाइकललाई ठक्कर दिँदा ६ जना घाइते भएका थिए। गम्भीर घाइते भएका १ को उपचारका लागि त्रिवि शिक्षण अस्पताल लैजाँदै गर्दा मृत्यु भएको हो ।

मृतक र घाइतेको नाम खुलेको छैन । घाइतेमध्ये ४ जनाको सिनामंगलस्थित केएमसी र १ जनाको नयाँ बानेश्वरको शिभिल अस्पतालमा उपचार भइरहेको छ । केएमसीमा उपचाररत एकको अवस्था गम्भीर छ ।

बा ३ ख ४३१७ नम्बरको ट्रिपरले बा ८५ प ५६९, बा ३८ प २३९३ र बा ४३ प ८७३५ नम्बरको मोटरसाइकललाई ठक्कर दिएको हो । घटनाको पूर्ण विवरण आउन बाँकी रहेको प्रहरीले जनाएको छ ।

प्रहरीका अनुसार मोटरसाइकलले ओभरटेक गर्ने क्रममा ट्रिपरले ठक्कर दिएको र अन्य दुई मोटरसाइकल पनि सोही ठाउँमा ठोक्किएका थिए ।