काठमाडौं– गण्डकी प्रदेश सरकारका स्वतन्त्र सांसद राजीव गुरुङ ‘दीपक मनाङे’ले मन्त्रालय बेच्ने कुरा कुरामा आफूले ठट्टामा भनेको बताएका छन् ।

सोमबार गण्डकी प्रदेशमा गरिएको मन्त्रालय बाँडफाँट स्वतन्त्र सांसद मनाङे असन्तुष्ट थिए । आफूले सम्हालिरहेको भौतिक मन्त्रालय नेकपा एमालेलाई दिएर वन मन्त्रालयमा सरुवा गरिएपछि उनी रिसाएका थिए। त्यहीकारण उनले मन्त्री पदबाट राजीनामा पनि दिइसकेका छन् ।

त्यसपछि उनले एकजना स्थानीय पत्रकारसँग गरेको फोन संवादको अडिओ बाहिरिएको थियो । उनले उक्त अडिओ संवादमा ३ करोडमा वन मन्त्रालय बेच्न लागेको बताएका थिए ।

मनाङेले कांग्रेसले डेढ करोड रुपैयाँ दिइसकेको अवस्थामा एमालेसँग बार्गेनिङ भइरहेको बताएका थिए ।

मंगलबार उनले खबरहबसँग कुराकानी गर्दै आफू तनावमा भएको बेला त्यो कुरा बोलेको बताए । उनले भने, ‘तनावमा थिएँ । एउटा भाइले फोन गरेछ, रेला गरेर बोलेको हो । ठट्टा गर्ने बानी छ । मलाई किन पैसा चाहियो र मन्त्रालय बेच्नू ?’

सोमबार नेकपा एमालेलाई सरकारमा सामेल गराउन मुख्यमन्त्री सुरेन्द्रराज पाण्डेले मनाङेलाई वन मन्त्रालयमा पठाएका थिए । तर उनले त्यसमा असन्तुष्टि जनाउँदै राजीनामा दिइसकेका छन् ।