काठमाडौं– जहाजमा यात्रा गर्ने क्रममा चोरी गरेको आरोपमा २ जना चिनियाँ नागरिक पक्राउ परेका छन् ।

शनिबार टर्किस एयरलाइन्सको जहाजबाट इस्तानबुल जान लागेको २ जना चिनियाँ नागरिकहरु काठमाडौंमा पक्राउ परेका हुन् ।

पक्राउ पर्नेमा चिनियाँ राहदानी इजी–६८४२७२२ वाहक मा चिउवेइ र इजी–५७४२५२३ वाहक हु सिङचोङ छन् ।

त्रिभुवन अन्तर्राष्ट्रिय विमानस्थस्थित नेपाल प्रहरीको विमानस्थल सुरक्षा कार्यालयबाट खटिएको प्रहरी टोलीले उनीहरुलाई पक्राउ गरेको हो ।

प्रहरीका अनुसार टर्किस एयरलाइन्सबाट बुधबार काठमाडौं आएकी डेनमार्ककी नागरिकले आफ्नो साथमा रहेको नगद र गहना चोरी भएको भन्दै प्रहरीमा उजुरी दिएकी थिइन् ।

ती महिलाको उजुरीमाथि अनुसन्धान गर्ने क्रममा उक्त गहना र नगद चिनियाँ नागरिकले चोरी गरेको फेला परेको प्रहरीले जनाएको छ ।

प्रहरीले पक्राउ परेका चिनियाँ नागरिकहरुको साथबाट २ थान सुनको बाला र विभिन्न देशका मुद्रा फेला पारेको जनाएको छ ।

पक्राउ परेका २ चिनियाँमाथि थप अनुसन्धान गर्न महानगरीय प्रहरी बृत्त गौशाला बुझाइएको प्रहरीको विमानस्थल सुरक्षा कार्यालयले जनाएको छ ।