काठमाडौं- नेपाली कांग्रेसका सांसद राजेन्द्र बजगाईँले प्रधानमन्त्री केपी शर्मा ओली र पूर्व प्रधानमन्त्री शेरबहादुर देउवा सहभागी भएर सोमबार आयोजित गौरा पर्वको कार्यक्रममा राष्ट्रिय स्वतन्त्र पार्टीले घुसपैठ भएको आशंका गरेका छन् ।

बिहीबार प्रतिनिधि सभाको बैठकमा विशेष समय लिएर सम्बोधन गर्दै बजगाईँले उक्त कार्यक्रममा घुसपैठ गरेर रास्वपाले धार्मिक सहिष्णुता बिगार्न खोजेको आरोप लगाए ।

गौरा पर्वको अवसरमा आयोजित कार्यक्रममा ओली–देउवाविरुद्ध नारा लगाउने एकजना वाईसीएल कार्यकर्तासहित दुईजना प्रहरीको हिरासतमा छन् । बुधबार भएको प्रतिनिधिसभाको बैठकमा रास्वपा सांसद हरि ढकालले दुवैलाई रिहा गर्नुपर्ने बताएका थिए ।

‘प्रतिपक्षी (रास्वपा) सांसद साथीहरूले गौरा पर्वको अवसरमा टुँडिखेलमा प्रदर्शन गर्नेहरूको रिहाइ माग गर्नुभयो । दलका साथीहरू पनि त्यहाँ देखियो भनेर पत्रिकामा समाचार आएको छ’, उनले भने, ‘गौरा पर्वमा आक्रमण गरेको कि प्रधानमन्त्री र सत्ता साझेदार पूर्वप्रधानमन्त्रीमाथि आक्रमण गरेको ? धार्मिक सहिष्णुता बिगार्ने गतिविधि गर्ने दललाई म प्रश्न गर्न चाहन्छु ।’उनले भने ।