काठमाडौं–विद्यासुन्दर शाक्य मेयर भएर काठमाडौं महानगरपालिकामा आएको २ वर्ष पुग्नै लाग्यो । यो अवधिमा उनले विकासका कामलाई अघि बढाउने र सुन्दर काठमाडौं बनाउने योजना पनि सुनाइरहन्छन् । तर, उनको कामले महानगरबासीले राहतको अनुभूति गर्न सकेका छैनन् । महानगरले जनप्रतिनिधि र कर्मचारीको भत्ता, सुविधा र भ्रमणमा मात्र ९ करोड खर्चिएको खबर राजधानी दैनिकले मुख्य समाचार बनाएको छ । महानगरको विकास निर्माणमा ११ प्रतिशत तलबभत्ता र सुविधामा ६६ प्रतिशत खर्च भएको पाइएको छ ।

भ्रष्टाचारका अनेक रुप शीर्षकको अर्को समाचारमा केन्द्रदेखि जिल्लास्तरमा रहेका सरकारी कार्यालयले जिन्सी तथा अन्य सामान खरिदमा एक वर्षमा आफूखुसी एक अर्ब बढी रुपैयाँ खर्चै गर्ने गरेको आइएको छ । आफूखुसी खरिदले राज्यलाई करोडौं घाटा भएको छ भने, ठेकेदारलाई मालामाल भएको छ ।

कांग्रेसमा फेरि देउवा र पौडेलबीच खटपट भएको अर्को खबर छ । महासमिति बैठकमा ‘डिप लभ’ मा परेको व्याख्या गर्ने कांग्रेस सभापति शेरबहादुर देउवा र बरिष्ठ नेता रामचन्द्र पौडेलबीच खटपट सुरु भएको छ । महासमिति बैठक सकिएको २ महिना बित्न नपाउँदै महासमिति बैठकले पारित गरेका मूल मुद्दाका विषयमा कुरा नमिल्दा खटपट चुलिएको हो ।

त्यस्तै ट्याक्सी डाइभरले भेटाएको चारलाख बराबरको सामान सम्बन्धित व्यक्तिलाई फर्काएको, ५७ लाख नेपाली अझै नागरिकताबिहीन अवस्थामा रहेकोलगायतका समाचारलाई छापेको छ ।