काठमाडौं – सहकारी संस्थाको बचत रकम दुरुपयोग संसदीय छानबिन विशेष समितिले जेलमा रहेका सूर्यदर्शन बचत तथा ऋण सहकारीका सञ्चालकहरुसँग सोधपुछ गरेको छ ।

समितिका सभापति सूर्य थापाका अनुसार बुधबार सिंहदरबारमा बसेको बैठकमा समितिले जेलमा रहेका सूर्यदर्शन सहकारी पोखराका पूर्व सञ्चालक भविश्वर अर्याल, सचिव तथा गोरखा मिडिया नेटवर्क प्रालिका सञ्चालक कुमार रम्तेल र पूर्व सञ्चालक शिवकुमार गुरूङ(महेन्द्र भोटे)सँग बयान लिएको छ । उनीहरुलाई कास्की सुधार गृहबाट बैठकमा उपस्थित गराइएको थियो ।

यस्तै अर्यालसँग आज समय अभावका कारण आधा मात्रै सोधपुझ गरिएकाे समितिका एक सदस्यले जानकारी दिए । उनलाई भोलि ८ बजेदेखि पुनः बयान लिने गरी समितिमा बोलाइएको छ।

भोलि बुधबार पोखराकै बाँकी तीन सहकारीका पीडकहरूसँग जेलबाट बैठकमा बोलाइएर सोधपुछ गर्ने कार्यक्रम रहेको समितिले जनाएकाे छ ।

विशेष समितिको कार्यविधि अनुसार विभिन्न सहकारी दुरुपयोगमा संलग्न व्यक्तिहरूको सोधखोज भइरहेको सभापति थापाको भनाइ छ ।

यसअघि समितिले डम्बरबहादुर तामाङ, गोरखा बचत तथा ऋण सहकारी संस्था ललितपुरका पूर्वअध्यक्ष डिबी बम्जन, गोरखा बचत तथा ऋण सहकारी संस्था, ललितपुरका अध्यक्ष इमानसिंह राई, श्री लालीगुराँस बहुउद्देश्यीय सहकारी संस्था पुलचोक ललितपुरका कार्यकारी प्रमुख सुरेन्द्र भण्डारी, गौतमश्री बहुउद्देश्यीय सहकारी संस्था कुलेश्वर काठमाडौंका सचिव रामबहादुर गौतम, पशुपति बहुउद्देश्यीय सहकारी संस्थाका अध्यक्ष तथा कान्तिपुर सेभिङ एण्ड कोअपरेटिभका पूर्व अध्यक्ष सीबी लामा लगायतलाई सोधपुछ गरेको थियो ।
ं