मेसेडोनिया– जबरजस्ती रकम अशुलीको अभियोगमा उत्तरी मेसेडोनियाकी विशेष अपराध अभियोजनकर्ता पक्राउ परेकी छिन् ।

आफ्नो कार्यालयले अनुसन्धान गरिरहेका एक व्यापारीसँग रकम अशुलेको अभियोगमा उत्तरी मेसेडोनियाकी संगठित अपराधका लागि विशेष अभियोजनकर्ता कटिचा यानेभालाई पक्राउ गरिएको उत्तरी मेसेडोनियाको प्रहरीले जनाएको छ ।

उनीविरुद्ध व्यापारी ओर्चे कामचेभसँग १५ लाख युरो अशुली गरेको अभियोग लागेको छ । यो प्रकरणमा यसअघि दुई जनालाई पक्राउ गरिएको थियो ।

अभियोजनकर्ता यानेभाले भने आफूले कुनै गल्ती नगरेको बताउँदै आएकी छिन् । त्यहाँका प्रमुख अभियोजनकर्ता ल्यूबोमिर योभेस्कीले भने यानेभाले आफ्नो शक्तिको दुरुपयोग गरी अपराधिक कार्य गरेको प्रमाण फेला परेको दाबी गरेका छन् ।

उत्तरी मेसेडोनियामा उच्च तहसम्म संगठित अपराधको जालो फैलिएको विश्वास गरिन्छ । यसैलाई न्यूनीकरण गर्नका लागि सन् २०१५ मा युरोपेली युनियन ईयूको मध्यस्थतामा संगठित अपराध अभियोजनकर्ताको कार्यालय स्थापना गरिएको थियो ।