एजेन्सी– इजरायलले गरेको ड्रोन हमलामा गाजापट्टीस्थित हमासका थप एक नेतासहित पाँच जनाको ज्यान गएको छ ।

प्यालेस्टाइनको चिकित्सा विभागले वेस्ट बैंकको एक इलाकामा इजरायलले गरेको ड्रोन आक्रमणबाट ती मानिसहरूको ज्यान गएको जानकारी दिएको हो ।

इजरायली सेनाले सो ड्रोन हमलाको लक्ष्य तुलकरम शहर नजिक रहेको उग्रवादीहरूको एक अखडा रहेको जनाएको छ । सवारीसाधन चढेर इजरायलमाथि आक्रमण गर्न अघि बढिरहेका पाँच बन्दुकधारीहरूलाई निशाना बनाएको उसले दाबी गरेको छ ।

प्यालेस्टाइनी मिडियाहरूका अनुसार इजरायली हमलामा मारिएका हमास नेताको नाम हैथम बलिदी हो । उनी हमासका सैन्य शाखा इज्ज-ए-दीन अल-कस्साम ब्रिगेडका स्थानीय कमाण्डर थिए ।

पछिल्लो एक हप्तामा इजरायलले आफ्नो सूचीमा राखेका तीन ठूला ‘दुश्मन’हरूको हत्या गरिसकेको छ । गत बुधबार इरानको राजधानी तेहरानमा हमासका शीर्ष राजनीतिक नेता इस्माइल हनिया मारिएका थिए ।

लेबनानको राजधानी बेरुतको दक्षिणी इलाकामा गरिएको हमलामा हिज्बुल्लाहका शीर्ष कमाण्डर फौद शुक्र मारिएको इजरायली सेनाले जानकारी दिएको थियो ।

त्यसलगत्तै इजरायलले हमासका सैन्य प्रमुख मोहम्मद दिएफको मृत्यु पुष्टि गरेको थियो । १३ जुलाइमा खान यूनिसमा गरेको हमलामा दिएफको मृत्यु भएको जानकारी इजरायली सेनाले यसै साता सार्वजनिक गरेको हो ।

यो पनि-

इजरायल जोगाउन सबै शक्ति मध्यपूर्व केन्द्रित गर्ने अमेरिकी घोषणा