एजेन्सी–आतंकवादी संगठन इस्लामिक स्टेटको नियन्त्रणमा रहेको पूर्वी सिरियाको बगौज क्षेत्रबाट सयौँ सर्वसाधारण सुरक्षित स्थानतर्फ सारिएको छ । दर्जनौँ ट्रकमा चढेर उनीहरु इस्लामिक स्टेटको गढबाट अमेरिका समर्थित कुर्दिस लडाकु नेतृत्वको सिरियन डेमोक्र्याटिक फोर्स एसडिएफको नियन्त्रण रहेको स्थानतर्फ आएको एसडिएफले जनाएको छ ।

इस्लामिक स्टेटको गढबाट भागेर आउने सर्वसाधारणको यो अन्तिम समूह रहेको जनाइएको छ । सर्वसाधारण र इस्लामिक स्टेटका लडाकुलाई छुट्याएपछि इस्लामिक स्टेटविरुद्ध त्यस क्षेत्रमा वृहद सैनिक आक्रमण गरिने एसडीएफले जनाएको छ ।

हाल इस्लामिक स्टेट पूर्वी सिरियामा युफ्रातेज नदिको किनारमा केही सय वर्गमिटरको क्षेत्रमा सिमित छ । इस्लामिक स्टेटको अन्तिम गढमा अमेरिका समर्थित एसडीएफले सैनिक कारवाही गरिरहेको छ । सैनिक कारवाही केही दिनभित्रै सकिने र त्यसपछि पूर्वी सिरियाबाट इस्लामिक स्टेट पराजित हुने अपेक्षा छ ।