काठमाडौं- प्रधानमन्त्री केपी शर्मा ओलीले सम्बन्धित मन्त्रीलाई सघाएर परिणाम आउने गरी काम गर्न नवनियुक्त राज्यमन्त्रीहरूलाई निर्देशन दिएका छन् ।

प्रधानमन्त्री तथा मन्त्रिपरिषद्को कार्यालय सिंहदरबारमा शुक्रबार नवनियुक्त तीन राज्यमन्त्रीको सपथ ग्रहण समारोहमा बधाई तथा शुभकामना दिँदै ओलीले राज्यमन्त्रीमो मुख्य काम सम्बन्धित मन्त्रीलाई सहयोग गर्ने भएकाले रचनात्मक हुन आग्रह गरे ।

उनले निर्देशनका क्रममा आफ्नो कार्यक्षेत्रको सदुपयोग गर्न पनि सुझाव दिए । प्रधानमन्त्री ओलीले सम्बन्धित मन्त्रीहरूले पनि राज्यमन्त्रीलाई आवश्यक जिम्मेवारी दिने र परिणाम निकाल्नेबारे ध्यान दिन आग्रह गरे ।

अहिलेको विषम परिस्थितिलाई अनुकूलतर्फ लैजना आफूहरू प्रयत्नरत रहेको बताउँदै प्रधानमन्त्री ओलीले नवनियुक्त राज्यमन्त्रीलाई गलत मान्छेको संगत र उनीहरूको प्रलोभनमा नपर्न सचेत गराए ।

उनले राज्यमन्त्रीहरूले मन्त्रालयसँग सम्बन्धित सबै विषयमा विस्तृत अध्ययन गरेर सूचनाको भण्डारका रुपमा रहन र मन्त्रीहरूलाई सहयोग गर्न पनि आग्रह गरे।