काठमाडौं– सुदर्शन थापाको निर्देशन रहेको फिल्म ‘रावायण’ को टिजर सार्वजनिक भएको छ । काठमाडौंका शुक्रबार एक कार्यक्रमको आयोजना गरी टिजर सार्वजनिक गरिएको हो ।

टिजरमा फिल्मका शीर्ष नायक पल शाहको एक्सनलाई उच्च स्थान दिएको पाइन्छ । टिजर द्वन्द्वका दृश्यले भरिपूर्ण छ । पललाई दोहोरो भूमिकामा देख्न सकिन्छ ।

दर्शकले यस पटक फरक स्वादको सिनेमा दिन लागेको पलको भनाइ छ । आफूले निर्वाह गरेको चरित्रबारे पल भन्छन्, ‘मेरो लागि यो चरित्र नयाँ हो । फिल्ममा मैले कान्छा र रागव नामका दुई चरित्र निर्वाह गरेको छु । मेरो लागि यो फिल्म चुनौतीपूर्ण थियो । जुन टिजरमा देख्न सकिन्छ ।’

खलनायकको भूमिकामा प्रमोद अग्रहरी, प्रकाश शाह, प्रदीप ढकाललाई देख्न सकिन्छ । टिजरमा नायिका पूजा शर्मा, प्रियंका कार्की, निकिता चण्डक पनि फिचर्ड छन् ।

प्रेमकथाका फिल्म निर्देशनको छवि बदल्न यस फिल्मले सहयोग गर्नेमा आफू आशावादी रहेको निर्देशक थापाले बताए । टिजर सार्वजनिकपछि उनले भने, ‘यो फिल्म मेरा लागि चुनौतीपूर्ण थियो । मैले यो फिल्ममार्फत आफूलाई परिवर्तन गर्ने कोशिस गरेको छु ।’

फिल्मकी नायिका तथा निर्मात्री पूजा शर्माले अब रोएर फिल्म नचल्नेमा आफू ढुक्क रहेको बताइन् । ‘अब रोएर फिल्म चल्दैन । टिमको राम्रो साथ पाइयो भने मात्र फिल्म चल्ने रहेछ’, उनले भनिन् ।

सुदर्शन थापा प्रोडक्सन र पूजा शर्मा प्रोडक्सनको संयुक्त व्यानरमा बनेको फिल्मकी निर्माता पूजा शर्मा हुन् । फिल्ममा सुशन पाठक कार्यकारी निर्माता छन् ।

फिल्ममा पल शाह, पूजा शर्मा, प्रियंका कार्की, प्रमोद अग्रहरी, निकीता चण्डक, प्रकाश शाह, कैलाश रावल, अर्जुनजंग शाही, शर्मिला मल्ल, प्रदिप ढकाल, रोजिता पराजुलीलगायतको अभिनय छ ।

फिल्ममा शिवम अधिकारीको लेखन, प्रदीप श्रीवास्तवको पटकथा रहेको छ । आगामी भदौ २१ लाई प्रदर्शन मिति तोकिएको छ ।

टिजर हेर्नुहोस् :