वशिंटन डीसी– अमेरिकाले ताइवानलाई ६६ वटा अत्याधुनिक एफ–१६ लडाकु विमान बिक्रीका लागि बाटो खुला गरेको छ ।

अमेरिकी राष्ट्रपति डोनाल्ड ट्रम्पले यसका लागि औपचारिक स्वीकृत प्रदान गरेको अन्तर्राष्ट्रिय सञ्चारमाध्यमले जनाएका छन् । अमेरिकाको विदेश मन्त्रालयले ८ अर्ब अमेरिकी डलरमा ६६ वटा एफ–१६ लडाकू विमान ताइवानलाई बेचिने जनाएको छ ।

चीनसँग व्यापार युद्ध, हङकङलगायतका विषयमा विवाद चलिरहेका बेला अमेरिकाले ताइवानलाई अत्याधुनिक लडाकु विमान बिक्री गर्ने भएको हो । अमेरिकाको यो कदमपछि दुई मुलुकबीच तनाव चर्किनसक्ने आशंका गरिएको छ ।

यता चीनले भने अमेरिकी कदमको चर्को आलोचना गरेको छ । अमेरिकी कदमले त्यस क्षेत्रको शान्ति तथा स्थायीत्वलाई असर पार्ने चीनको चेतावनी छ ।

चीनले ताइवानलाई आफ्नै भूभागको रुपमा हेर्ने गरेको छ । ताइवानलाई मूख्यभूमिमा गाभ्नका लागि चीनले सैनिक विकल्प पनि खुला रहेको बताउने गरेको छ ।