काठमाडौं– डडेलधुरामा हैजाको प्रकोप फैलिएको छ । एक साता यता फैलिएको हैजाका कारण ८१ जना बिरामी परेका छन् ।

परशुराम नगरपालिका वडा नं– ८, गैरी गाँउ, सानो खोला र गुप्तेगाडामा हैजाको प्रकोप फैलिएको जिल्ला जनस्वास्थ्य कार्यालय डडेल्धुराले जनाएको छ ।

साउन २९ देखि शुरु भएको झाडापखालाबाट ८१ जना प्रभावित भएका छन् । जसमध्ये एक जनालाई १ सेती अस्पतालमा रेफर गरिएको छ । उनको अवस्था हाल सामान्य बन्दै गएको छ ।

अन्य बिरामीहरुको जमुरानी बर्थिंग सेन्टर र जोगबुढा अस्पतालमा उपचार भइरहेको जिल्ला स्वास्थ्य निर्देशनालय डोटीले जनाएको छ । विरामीहरुको उपचारका लागि जिल्ला जनस्वास्थ्य कार्यालयको टोली परिचालन गरिएको छ ।

बिरामीमध्ये २ जनाको दिसाको नमूना परीक्षण गर्दा १ जनामा हैजाको जिवाणु देखिएको  र थप परीक्षणका लागि राष्ट्रिय जनस्वास्थ्य प्रयोगशाला टेकुमा ल्याउने तयारी गरिएको छ ।