हङकङ– हङकङमा प्रजातन्त्रवादी प्रदर्शन चर्किरहेका बेला चीनले हङकङस्थित बेलायती वाणिज्य दूतावासमा कार्यरत कर्मचारीलाई पक्राउ गरेको छ ।

चीनको विदेशमन्त्रालयले हङकङस्थित बेलायती दूतावासमा कार्यरत कर्मचारीलाई पक्राउ गरिएको पुष्टि गरेको हो । हङकङका नागरिक ती कर्मचारी गत अगष्ट ८ यता हराइरहेका थिए । व्यापारिक भेटघाटका लागि हङकङको सीमामा रहेको चिनियाँ शहर सेन्जेन गएका कर्मचारी सिमोन चेङलाई हङकङ फर्किने बेला पक्राउ गरिएको पारिवारिक श्रोतलाई उद्धृत गर्दै एएफपीले जनाएको छ ।

उनी तीब्र गतिको रेल चढेर हङकङ फर्केको र सीमानजिक उनले आफ्नी प्रेमिकालाई सन्देश पठाएयता उनी सम्पर्क बाहिर थिए ।
उनले सार्वजनिक सुरक्षामा चुनौति थपेका कारण उनलाई १५ दिने प्रशासनिक नियन्त्रणमा राखिएको चिनियाँ विदेशमन्त्रालयको भनाइ छ । उनी हङकङका नागरिक भएका कारण उनको पक्राउ चीनको आन्तरिक मामिला रहेको चिनियाँ विदेश मन्त्रालयले जनाएको छ ।

पछिल्लो समय हङकङमा प्रदर्शन चर्किरहेका चीनले बेलायती दूतावासका कर्मचारी पक्राउ गरेको हो । चीनले हङकङमा जारी प्रदर्शनलाई उक्साउन बेलायतसहितका पश्चिमा मुलुकको हात रहेको आरोप लगाउँदै आएको छ । योसँगै चीन र बेलायतबीचको सम्बन्ध बिग्रिने अन्तर्राष्ट्रिय सञ्चारमाध्यमले जनाएका छन् ।