वाशिंटन डीसी– डेनमार्कले अमेरिकालाई विश्वकै सबैभन्दा ठूलो टापु ग्रिनल्याण्ड नबेच्ने भएपछि अमेरिकी राष्ट्रपति डोनाल्ड ट्रम्पले डेनमार्क भ्रमण रद्द गरेका छन् ।

राष्ट्रपति ट्रम्पले यसअघि डेनमार्कको स्वशासित क्षेत्रका रुपमा रहेको विश्वको सबैभन्दा ठूलो टापु ग्रिनल्याण्ड खरिद गरी अमेरिकामा गाभ्ने मनशाय देखाएका थिए । तर, ग्रिनल्याण्ड खरिद गर्ने ट्रम्पको मनशायलाई डेनमार्क तथा ग्रिनल्याण्डका अधिकारीले ठाडै अस्वीकार गरेका थिए ।

डेनमार्ककी प्रधानमन्त्री मेटे फ्रेडरिकसनले भने राष्ट्रपति ट्रम्पको मनशायलाई हास्यास्पद भन्दै ट्रम्प गम्भीर बन्न नसकेको टिप्पणी गरेकी थिइन् । ट्रम्पको यस्तो मनशायको ग्रिनल्याण्ड तथा डेनमार्कका राजनीतिक नेताहरुले पनि आलोचना गरेका थिए ।

यसैकारण ट्रम्पले डेनमार्ककी महारानी मर्गरेट द्वितीयका निमन्त्रणामा आगामी सेप्टेम्बर २ मा गर्न लागेको भ्रमण रद्द गरेका हुन् । ह्वाइट हाउसले पनि ट्रम्पले डेनमार्क भ्रमण रद्द गरेको पुष्टि गरेको छ ।