काठमाडौँ– गोरखाको धार्चे गाउँपालिका–५, सिङ्लास्थित रेसेमा आइतबार गएको पहिरोमा परी बेपत्ता भएकाहरूको अझै पत्ता लाग्न सकेको छैन ।

आइतबार बिहान गएको पहिरोमा परेर पाँचजना बेपत्ता भएका थिए । दुईजनाको भने घाइते अवस्थामा उद्धार गरी काठमाडौँमा ल्याएर उपचार भइरहेको छ ।

बेपत्ता भएकाहरूको आइतबार दिनभर खोजी गर्दा पनि नभेटिएपछि आज बिहानैदेखि खोजी सुरु गरिएको जिल्ला प्रहरी कार्यालयका प्रहरी नायब उपरीक्षक रमेशकुमार श्रेष्ठले जानकारी दिए ।

खोजीका लागि नेपाल प्रहरी, नेपाली सेना, सशस्त्र प्रहरी बल र स्थानीय जुटेका छन् । डाँडाबाट खसेको पहिरो बुढीगण्डकी नदीसम्म पुगेकाले बेपत्ता भएकाहरूलाई नदीको बगाएको हुनसक्ने अनुमान गरिएको छ ।

प्रहरीले आजदेखि बुढीगण्डकी नदी किनार आसपासका क्षेत्रमा पनि बेपत्ताको खोजी थालेको प्रहरी नायब उपरीक्षक श्रेष्ठले बताए । उनले खोजीका लागि जेसीबी मेसिनसमेत प्रयोग गरिएको बताए ।

पहिरोमा एकै घरका तीन सहित पाँच जना बेपत्ता भएका थिए। बेपत्ता हुनेमा धार्चे गाउँपालिका–५ रेसेका जितबहादुर गुरुङ, उनकी श्रीमती कान्छी गुरुङ, बुबा सुकलाल कान्छा गुरुङ, सोही ठाउँका रमेश गुरुङ र हाइड्रो पावरका ट्याक्टर चालक रमेश परियार बेपत्ता छन्।