नयाँ दिल्ली- नेपालको छिमेकी भारतीय राज्य बिहारमा हरेक साल आउने बाढीसँग जुध्न भारत सरकारले ठूलो बजेट छुट्याएको छ ।

भारत सरकारका लागि वित्तमन्त्री निर्मला सीतारमणले मंगलबार बजेट भाषण गर्दै कोशीको बाढीबाट बिहारलाई जोगाउन बजेट छुट्याएको बताइन् ।

मंगलबार लोकसभामा बजेट भाषणका क्रममा वित्तमन्त्रीले बिहारलाई बाढीबाट जोगाउन विशेष योजना अघि सारिने बताइन् ।

उनले बजेट भाषणका क्रममा नेपालको तर्फबाट बाढी नियन्त्रणको काममा ध्यान दिइने बताइन् । उनले बिहारमा रहेका सिँचाइ परियोजनालाई बाढीबाट जोगाउन केन्द्र सरकारबाट ठूलो लगानी गर्ने बताइन् ।

यसका लागि ११ हजार ५०० करोड रुपैयाँको बजेट छुट्याएको जानकारी उनले दिइन् । यसमा कोशी-मिची इन्स्ट्र स्टेट लिङ्क, ब्याराज निर्माण र नदी प्रदूषण अन्त्यका लागि लगानी गरिने बताइन् । उनले कोशीको बाढीबाट बिहारलाई मुक्त गर्न अब सर्भे थालिने बताइन् ।

नेपालबाट आउने बाढी नियन्त्रण प्रणाली निर्माणमा पनि लगानी गरिने उनले बताइन् । वित्त मन्त्री सीतारमणले बिहारमा हरेक वर्ष नेपालबाट आउने बाढी नियण्त्रणका लागि ‘कन्ट्रोल सिस्टम’ बनाउने घोषणा गरिन् ।

वित्तमन्त्री सीतारमणले बजेट भाषणका क्रममा नेपालबाट आउने बाढी रोकथाम र नियन्त्रणका लागि सरकारी तहमा वार्ता अघि बढाउने पनि बताएकी छन् ।