काठमाडौं- सरकारले काठमाडौंको नागार्जुन नगरपालिकामा गरिब र सुकुम्बसीका लागि बनाएका भव्य अपार्टमेन्ट वर्षौँदेखि अलपत्र छन् ।

बागमती, विष्णुमती र मनोहरा किनारमा हजारौँ सुकुम्बासीले अड्डा जमाउँदा उनीहरूकै लागि निर्मित सुन्दर अपार्टेमन्ट अलपत्र परेका हुन् ।

सरकारले सुकुम्बासी र गरिब जनताका लागि चारवटा ठूला अपार्टमेन्ट निर्माण गरे पनि अझैसम्म प्रयोगविहीन छन् ।

सरकारले १२ करोड रुपैयाँ लगानी गरी दुई ठाउँ गरेर एउटामा १०० र अर्कोमा १२४ फ्ल्याट बनाएको छ ।

तत्कालीन प्रधानमन्त्री डा. बाबुराम भट्टराईको पालामा २०६९ सालमा सरकारले काठमाडौंको खोला किनारमा बसोबास गर्ने सक्कली सुकुम्बासीलाई सुविधा दिने उद्देश्यले यी भवन बनाएको थियो ।

तर अहिले ती अपार्टमेन्टमा वास्तविक सुकुम्बासीहरू बसेका छैनन् । शहरी विकास तथा भवन निर्माण विभागको नेतृत्वमा निर्माण भएका काठमाडौंको नागार्जुन नगरपालिकास्थित अपार्टमेन्ट अलपत्र छन् ।

पूर्ण सुविधासम्पन्न ती अपार्टमेन्ट हस्तान्तरण नहुँदा जीर्ण भएका छन् । तीमध्ये पहिलोलाई कार्यालय र अस्थायी पोष्टको रुपमा प्रयोग गरिएको छ । अर्कोलाई मानव सेवा आश्रमका लागि प्रयोग गर्न दिइएको छ ।

सुकुम्बासी र गरिबका लागि बनाइएका अपार्टमेन्टहरू पूर्ण रूपमा प्रयोग हुन नसकेकाले जीर्ण भएका छन् । अपार्टमेन्टमा झारपातले ढाकेका छन् ।