काठमाडौं– सुरक्षालाई ध्यानमा राख्दै सिम्रिक एयरलाइन्सका जहाज उडानमा रोक लगाइएको छ । नेपाल नागरिक उड्डयन प्राधिकरणले जहाजमा राखिएका पार्टपूर्जामा सुरक्षा खतरा देखिएपछि तत्काल जहाजहरु ग्राउण्डेड गर्ने निर्णय गरेको हो ।

आइतबार र सोमबार गरिएको जाँचका क्रममा जहाजमा प्रयोग भएका पार्टपूर्जा हवाई सुरक्षाका दृष्टिकोणले खतरापूर्ण पाइएपछि उडानमा रोक लगाएको प्राधिकरण स्रोतको भनाइ छ ।

प्राधिकरणको यो निर्णयसँगै सिम्रिकका सबै ४ वटा जहाज ग्राउण्डेड भएका छन् ।

त्रिभुवन अन्तर्राष्ट्रिय विमानस्थलका प्रवक्ता प्रतापबाबु तिवारीले मंगलबार सिम्रिकका सबै उडान रद्द भएको पुष्टि गरे ।

हवाई उड्डयन क्षेत्रको नियामक निकाय प्राधिकरणले प्रत्येक हवाई कम्पनीको छुट्टाछुट्टै सुरक्षा जाँच गर्ने गर्दछ ।

सुरक्षा खतरा देखिएमा प्राधिकरणले आकाशमा उड्दै गरेको अवस्थामा पनि तत्काल अवतरणको निर्देशन दिन सक्छ ।