काठमाडौँ– अल कायदाका संस्थापक एवम् सेप्टेम्बर ११ हमलाका प्रमुख योजनाकर्ता ओसामा बिन लादेनको नजिकका सहयोगीलाई पक्राउ गरेको पाकिस्तानी अधिकारीहरूले बताएका छन् ।

पञ्जाबको आतङ्कवाद विरोधी विभागले गुजरात सहरबाट अमिन उल–हकलाई पक्राउ गरेको विज्ञप्तिमा जनाएको छ ।

आतङ्कवाद विरोधी विभागका प्रमुख उस्मान अकरम गोनादालले पत्रकार सम्मेलन गर्दै पक्राउ परेका उल हकलाई संयुक्त राज्य अमेरिका, युरोपेली सङ्घ र संयुक्त राष्ट्र सङ्घले अल–कायदा र बिन लादेनको सहयोगीको रूपमा सूचीबद्ध गरेको जनाएका छन् ।

अफगानिस्तानबाट पश्चिमी नेटो सेना फिर्ता भएपछि उनी फेरी देखा परेका थिए । उनले अगस्टमा अफगानिस्तानको भ्रमण गरेर अल–कायदाको पुनर्गठन गर्ने प्रयास सुरु गरेका थिए ।

नेटो समर्थित अमेरिकी सेनाले सेप्टेम्बर ११ को आक्रमणमा संलग्न अल–कायदाका लडाकुहरूलाई हस्तान्तरण गर्न अस्वीकार गरेको भन्दै सन् २००१ मा तालिबानको पहिलो शासनलाई अपदस्थ गरेको थियो ।

आक्रमणका प्रमुख योजनाकर्ता बिन लादेन पछि पाकिस्तानमा बसेको पत्ता लागेको थियो । उनी सन् २०११ मा अमेरिकी कारबाहीमा मारिएका थिए ।