काठमाडौं । परराष्ट्र सचिव सेवा लम्साल र भारतका विदेशमन्त्री एस जयशंकरबीच भेटवार्ता भएको छ।

दोस्रो बिमस्टेक मन्त्रीहरूको रिट्रीटमा सहभागी हुन दिल्ली पुगेकी लम्सालले बिहीबार जयशंकरसँग भेटवार्ता गरेकी हुन् । भेटवार्तामा दुई देशबीच सहयोग विकास गर्नेबारे छलफल भएको बताइएको छ ।

भारतको नयाँ दिल्लीमा जुलाई ११–१२ मा हुने दोस्रो बिमस्टेक विदेश मन्त्रीहरूको रिट्रिटमा बिमस्टेक ढाँचाभित्रका पारस्परिक हित र पूरकताका सहमति भएका क्षेत्रमा क्षेत्रीय सहयोग र साझेदारीलाई थप सुदृढ बनाउने विषयमा छलफल हुने छन् ।

सो अवसरमा बिमस्टेक सदस्य राष्ट्रका विदेशमन्त्री तथा प्रतिनिधिमण्डलका प्रमुखहरूले भारतका प्रधानमन्त्री नरेन्द्र मोदीसँग संयुक्त भेटवार्ता गर्ने कार्यक्रम छ ।

परराष्ट्र सचिव नेतृत्वको टोली १३ जुलाई २०२४ मा काठमाडौँ फर्कने तालिका रहेको छ ।