काबुल– सयौं स्वतन्त्रता दिवस मनाउँदै गर्दा अफगानिस्तानको जलालावाद शहरमा श्रृङ्खलाबद्ध शक्तिशाली विष्फोट भएको छ । जलालावाद शहरका विभिन्न क्षेत्रमा भएका १० श्रृङ्खलाबद्ध बम आक्रमणमा कम्तीमा ३४ जना घाइते भएको अधिकारीले जनाएका छन् ।

जलालावाद शहरमा आयोजित स्वतन्त्रता दिवसको कार्यक्रमलाई लक्षित गरी श्रृङ्खलाबद्ध बम आक्रमण भएको जनाइएको छ । जलालावाद क्षेत्रमा लडाकु समूहहरु तालिबान र इस्लामिक स्टेट धेरै नै सक्रिय रहेपनि आक्रमणको जिम्मा कुनै समूहले लिएको छैन । यसअघि शनिबार अबेर राजधानी काबुलमा ६३ जनाको ज्यान जानेगरी एक विवाह समारोहमा भएको बम आक्रमणको जिम्मा आतंकवादी संगठनले लिएको छ ।

अफगान राष्ट्रपति अशरफ घानीले स्वतन्त्रता दिवसको अवसरमा सम्बोधन गर्दै आतंककारीको गुँडलाई नष्ट पार्ने अभियान जारी रहेको जनाएका छन् । उनले अफगानिस्तानमा इस्लामिक स्टेटविरुद्धको कारवाहीलाई पनि निरन्तरता दिइने जनाएका छन् । यद्यपि घानीले पछिल्लो समय अमेरिका र तालिबानबीच भइरहेको शान्ति वार्ताबारे भने केही टिप्पणी गरेका छैनन् ।

अर्कोतर्फ तालिबानले स्वतन्त्रता दिवसको अवसरमा विज्ञप्ति जारी गर्दै सबै विदेशी फौजले अफगानिस्तान छाड्नुपर्नेमा जोड दिएको छ । यसअघि बेलायत र सोभियत संघका सेनाले पनि अफगानिस्तानमा हार खाएर फर्किनु परेको भन्दै तालिबानले ढिलोचाँडो अफगानिस्तानमा सक्रिय अन्तर्राष्ट्रिय फौजले पनि अफगानिस्तान छाड्ने तालिबानको टिप्पणी छ ।

कुनै पनि हिसाबमा बेलायती साम्राज्यको हिस्सा नभएपनि अफगानिस्तानले सन् १९१९ अगष्ट १९ का दिन पूर्ण स्वतन्त्रता पाएको अवसरमा हरेक वर्ष अगष्ट १९ मा स्वतन्त्रता दिवस मनाउँदै आएको छ ।