काठमाडौं- राष्ट्रिय सभाको बैठक सूचना टाँस गरि आइतबारसम्मका लागि स्थगित गरिएको छ ।

बिहीबार बोलाइएको बैठक विशेष कारणवश बस्न नसक्ने भएकाले राष्ट्रिय सभाका अध्यक्ष नारायणप्रसाद दाहालले आइतबार १ बजेर १५ मिनेटमा बस्ने गरी समय तोकेको संघीय संसद् सचिवालयद्वारा जारी सूचनामा उल्लेख छ ।

बैठकमा आर्थिक विधेयक, राष्ट्र ऋण उठाउने विधेयक र भन्सार महसुल विधेयक पारित गर्ने कार्यसूची रहेको थियो ।

तर, बजेटसँग सम्बन्धित विधेयकमा संशोधन गर्ने बिषयमा दलहरूबीच विवाद भएपछि बैठक प्रभावित भएको हो ।

यसैबीच राष्ट्रियसभाको बैठक स्थगित भएकोप्रति चार दलले आपत्ति जनाएका छन् ।

कांग्रेस, एमालेसहित जनता समाजवादी पार्टी (जसपा) र लोकतान्त्रिक समाजवादी पार्टी (लोसपा) ले संयुक्त प्रेस विज्ञप्ति जारी गर्दै कार्यव्यवस्था परामर्श समितिको बैठकमा अधिकांश सदस्यको असहमति जनाए पनि अचानक बैठक स्थगित भएको गरिएको भन्दै आपत्ति जनाएका हुन् ।

उनीहरूले अर्थमन्त्रीको गलत मनसायका कारण बजेट आश्रित विधेयकहरू पेश हुन नसकेको जनाएका छन् ।