काठमाडौं – नेकपा एकीकृत समाजवादी पार्टीको जारी दशौँ ममहाधिवेशनबाट ९३ जनाको नाम केन्द्रीय समिति सदस्यका रुपमा घोषणा हुँदा प्रेम आले छुटेका छन् ।

डोटीबाट प्रतिनिधि सभाका सदस्य एवम् पूर्व संस्कृति तथा पर्यटनमन्त्री आलेलाई समाजवादीले ९३ जना केन्द्रीय समिति सदस्यको सूचीबाट बाहिर राखेको हो ।

समाजवादीको विधानअनुसार केन्द्रीय समिति २९९ सय सदस्यीय हुन्छ । तर समाजवादीको पहिलो सूचीबाटै आले आउट भएका हुन् ।

पछिल्लो समय अध्यक्ष माधकुमार नेपालसँग असन्तुष्ट उनले महाधिवेशन बहिष्कार गरेका थिए। महाधिवेशन बहिष्कार गरेका उनी भारतमा घुमिरहेका थिए ।

• एकीकृत समाजवादीमा ९३ जना केन्द्रीय सदस्यको नाम घोषणा 

प्रज्ञा भवन कमलादीमा जारी दशौँ महाधिवेशनले ३ पदाधिकारीसहित ९३ जना केन्द्रीय सदस्य घोषणा गर्दा आले भने एउटा बैठकमा भएको बताइरहेका थिए ।

यसबारेमा उनलाई खबरहबले प्रश्न गर्दा जवाफ दिन मानेनन् । ‘म अहिले एउटा मिटिङमा छु’, उनले भने, ‘यसबारेमा म पछि कुरा गरौँला ।’

२०७७ भदौमा नेकपा एमाले फुटेपछि उनी एकीकृत समाजवादीमा लागेर मन्त्रीसमेत भएका थिए ।

एमालेमा रहँदा अध्यक्ष केपी शर्मा ओलीको कडा आलोचक उनको समाजवादीमा पनि सुरुदेखि नै अध्यक्ष माधव नेपालसँग मनमुटाव थियो ।

एमालेमा रहँदा नेपालकै गुटमा रहेका आलेले किन महाधिवेशन बहिष्कार गरे भन्ने खुल्न सकेको छैन । तर उनले समाजवादीलाई पिँध नभएको लोटा भन्दै आलोचना गरिरहेका छन् ।

यता महाधिवेशनमा आले भारततिर

यही आइतबार काठमाडौंमा दशाैँ महाधिवेशन उद्घाटन भइरहँदाआले भने भारत यात्रामा थिए । उनले आफू भारतमा रहेको सन्देश दिने गरी फेसबुकमा फोटोहरू पनि हालेका छन् ।

समाजवादी फुटाउन लागेको चर्चाबीच आलेको महाधिवेशन बहिष्कारलाई अर्थपूर्ण मानिएको छ । समाजवादीका ४ देखि ६ जना सांसद एमालेतिर फर्किन खोजेको चर्चाबीच अध्यक्ष नेपालले त्यसलाई असफल पार्न सफल भएको जवाफ पत्रकारहरूलाई दिएका थिए ।

डाेटीबाट प्रतिनिधि सभामा दोहोरिएका आले मन्त्री बन्न चाहन्थे । तर मन्त्री हुन नपाएपछि रुष्ट उनले महाधिवेशन नै बहिष्कार गरेपछि पहिलो लटको केन्द्रीय सदस्यको सूचीमा उनलाई समावेश नगरिएको हो ।