काठमाडौं–माधवकुमार नेपाल नेतृत्वको नेकपा एकीकृत समाजवादीको दशौँ महाधिवेशन प्रज्ञा भवन कमलादीमा दुई दिनदेखि जारी छ ।
दशौँ महाधिवेशनमा समाजवादीका सचिवद्वय रामकुमारी झाँक्री र राजेन्द्र राई स्क्रिप्ट लेखनकर्ताका रूपमा काम गरिरहेका छन्।
उनीहरू एकीकृत समाजवादीका सेलिब्रिटी नेता पनि हुन्। पूर्वसहरी विकास मन्त्री झाँक्री अध्यक्ष माधव नेपालसँग सुरुदेखि नै असन्तुष्ट छिन् । ६ महिनामै मन्त्रीबाट हटाइएपछि रुष्ट उनी र अध्यक्ष नेपालबीचको सम्बन्ध अझै सुमधुर हु्न सकेको छैन ।
रामकुमारी यस पटकको महाधिवेशनमा नेपाललाई रोकेर महासचिव भुसाललाई अध्यक्ष बनाउनुपर्ने लविइङमा रहेको उनीनिकटस्थहरू बताउँछन् ।
तर कोशी प्रदेशका पूर्व मुख्यमन्त्री राई भने तत्काल माधवकुमार नेपालको विकल्प नभएको बताइरहेका छन् ।
यति मात्रै होइन, समाजवादीमा भुसाल अध्यक्षको दाबेदारका रुपमा आए आफू पनि उनीसँग प्रतिस्पर्धामा उत्रिने बताइरहेका छन् ।
माधव नेपालले नेकपा एमालेबाट विद्रोह गरेर जन्माएको पार्टी भएकाले त्यसको औचित्य पुष्टि हुन बाँकी रहेकाले अहिले उनको विकल्प नभएको दाबी राईको छ ।
तर रामकुमारी भने पार्टीलाई प्रभावकारी रूपमा अगाडि बढाउन माधव नेपाल असफल भइसकेकाले अब विकल्पमा जानुपर्ने पक्षमा उभिएकी छन् ।
उनले अब पार्टीको नेतृत्व घनश्याम भुसालले गर्नुपर्ने बताउँदै आएकी छन् । रामकुमारीले भुसालकै नेतृत्वमा एकीकृत समाजवादीलाई नयाँ उचाइमा पुर्याउन सकिने निष्कर्ष निकालेकी छन् ।
यदि भुसाल अध्यक्षको उम्मेदवारका रुपमा मैदानमा उत्रिए आफू महासचिवका लागि प्रतिस्पर्धाका लागि तयार रहेको जनाउ उनले दिइसकेकी छन् ।
समाजवादीका सम्मानित नेता झलनाथ खनालले अध्यक्षको दाबीबाट औपचारिक रुपमा मैदान छाडिसकेका छैनन् । तर उनले आन्तरिक निर्णय गरिसकेकाले माधव नेपालले पनि राहत महसुस गरेका छन् ।
यस्तोमा अब एकीकृत समाजवादीमा अध्यक्ष नेपाल र महासचिव भुसालबीच नेतृत्वको प्रतिस्पर्धा हुने सम्भावना बलियो छ । एकथरीले भने सहमतिबाटै माधव नेपाललाई अध्यक्ष बनाउन लबिइङ गरिरहेका छन् ।
सचिव झाँक्री भने अहिले पनि पार्टीमा विकल्प नखोजे क्षयीकरण हुँदै गएर ०८४ को चुनावमा एकदुई सिट पनि नजित्ने दाबी गर्छिन् ।
उनी भुसाललाई अध्यक्षमा जिताएर महासचिव बन्न औपचारिक रूपमै लबिइङमा लागिसकेकी छन् ।
प्रतिक्रिया