विराटनगर–  कोशी प्रदेशका मुख्यमन्त्री हिक्मतकुमार कार्कीले कृषिलाई प्राथमिकता दिन प्रदेशवासीलाई आग्रह गरेका छन् ।

२१ औंँ राष्ट्रिय धान दिवसको अवसरमा आज शुभकामना सन्देश जारी गर्दै मुख्यमन्त्री कार्कीले खाद्य सुरक्षाको लागि देशकै प्रमुख अन्नबालीका रुपमा रहेको धानको उत्पादन वृद्धि गर्नु पर्ने आवश्यकता रहेको भन्दै प्रदेश सरकारले यथोचित सहयोग गर्ने बताए ।

कृषिलाई प्राथमिकतामा दिएर उत्पादन बढाउन आवश्यक रहेको उनको भनाइ छ । कृषि क्षेत्रको सुधार नभएसम्म उद्योगहरूको अवस्थामा पनि सुधार नआउने भन्दै उनले कृषि क्षेत्रको विकासका लागि प्रदेश सरकारले सीमित श्रोत र साधनकाबीच पनि प्राथमिकतामा राखेर काम गरिरहेको बताए ।

धानबालीको उत्पादन र उत्पादकत्व वृद्धि गरी समृद्ध अर्थतन्त्र निर्माणमा केन्द्रित हुन उनको आग्रह छ । पछिल्लो समयमा बसाइँसराई र विदेश पलायनले कृषि क्षेत्र धराशायी बन्दै गएकोमा चिन्ता व्यक्त गर्दै मुख्यमन्त्री कार्कीले दिगो विकासका लागि आधुनिक कृषि कर्ममा युवाहरूले चासो देखाउनु पर्ने बताए ।