एजेन्सी– भारतको अधिकांश स्थानमा शनिबारदेखिको भारी वर्षा आइतबार पनि जारी छ । भारी वर्षासँगैको बाढी र पहिरोका कारण भारतभर सयौंको ज्यान गइसकेको छ ।

भारतको मौसम पूर्वानुमान विभागले हिमाचल प्रदेश, चण्डिगढ, गुजरात, हरियाणा, उत्तरप्रदेश, राजधानी दिल्ली, पञ्जाब, उडिशा, झारखण्ड, बिहार, छत्तिसगढ, तामिलनाडू, पोण्डिचेरी, पश्चिम बंगाल, उत्तराखण्डलगायतका अधिकांश स्थानमा आइतबार पनि भारी वर्षा हुने जनाएको छ ।

शनिबारको भारी वर्षाका कारण भारतका नदिनालाहरुको तीब्रता बढेको भारतीय सञ्चारमाध्यमले जनाएका छन् । हिमाचल प्रदेशको मंडी जिल्लामा बाढीले ४ महिनाअघि निर्माण सम्पन्न गरिएको पुल भत्काएको छ भने उत्तरी भारतका ठाउँठाउँमा पहिरो गएको छ ।

बाढी र पहिरोका कारण उत्तरी भारतका पहाडी राज्यहरुमा सडक सञ्चार तथा विद्युत सेवा अवरुद्ध भएको छ । शनिबार उत्तरी राज्य जम्मू कश्मीरमा सरदर ८ इन्च वर्षा भएको थियो ।

त्यस्तै, पश्चिमी भारतका नदीहरुले पनि खतराको सीमा पार गरेका छन् । पञ्जावको सत्लज नदिको जलस्तर पनि धेरै नै बढेको बताइएको छ । राजस्थान र गुजरातमा पनि भारी वर्षाका कारण डुबानमा परेका छन् ।

त्यस्तै, दक्षिण भारतमा पनि बाढीको स्तर उच्च छ । आन्ध्र प्रदेशका कृष्णा नदीको वहाव बढेका कारण त्यस क्षेत्रका धेरै गाउँहरु डुबानमा परेको र कैयौं गाउँहरु खाली गराइएको छ ।

यो वर्षको मनसुनमा भारतमा अहिलेसम्म २ सय ६९ जनाको मृत्यु भएको अधिकारीहरुले जनाएका छन् ।