काठमाडौं- प्रमुख सत्तारुढ नेकपा एमालेका अध्यक्ष केपी शर्मा ओलीले आगामी आर्थिक वर्ष २०८१/८२ को बजेट राम्रो भएकाले पास भएको बताएका छन् ।

मंगलबार संसद् भवन नयाँ बानेश्वरमा सञ्चारकर्मीको प्रश्नमा ओलीले आगामी आर्थिक वर्षको बजेट राम्रो भएकैले सदनबाट बहुमतले पास भएको बताए ।

प्रधानमन्त्रीले मन्त्रीहरूले नै आफूखुसी बजेट राखेको भन्ने गुनासो गरिरहेका छन् नि भन्ने प्रश्नमा ओलीले आफूले त्यस्तो नसुनेको जिकिर गरे ।

मंगलबार प्रतिनिधिसभाबाट आगामी आर्थिक बर्षको बजेट पारित भइसकेको छ ।

पूर्व प्रधानमन्त्री ओलीले सरकारले ल्याएको आगामी आर्थिक वर्षको बजेटप्रति गत जेठ १९ गते असन्तुष्टि जनाएका थिए । 

ओलीले सत्तारूढ दलहरूसँग परामर्श नगरी बजेट ल्याइएको भन्दै असन्तुष्टि जनाएका थि ।

ओलीले छलफल नहुँदा यो अर्थमन्त्रीको बजेट हो कि, अर्थमन्त्री भएको पार्टीको बजेट हो थाहा नभएको बताएका थिए । 

उनले भनेका थिए, ‘दलहरूसँग छलफल नहुँदा यो अर्थमन्त्रीको बजेट हो कि, अर्थमन्त्री भएको पार्टीको बजेट हो की ? जस्तो अलि बढ्ता देखिन गएको छ। र रकमको बाँडफाँड पनि त्यस्तै गरेर अलि बढी एकातिर ढल्किएको खालको जस्तो देखिन्छ ।’