काठमाडौं- राष्ट्रिय स्वतन्त्र पार्टी (रास्वपा)ले दोस्रो स्थापना दिवसका अवसरमा केन्द्रीय कार्यालय च:मतीमा चियापान कार्यक्रम आयोजना गरेकोछ ।

कार्यक्रममा कांग्रेस सभापति शेर बहादुर देउवा, एमाले अध्यक्ष केपी शर्मा ओली, नेकपा एकीकृत समाजवादीका अध्यक्ष माधव कुमार नेपाल, राप्रपा अध्यक्ष राजेन्द्र लिङ्देन लगायतका नेताहरू उपस्थित भए ।

चियापान कार्यक्रममा नेकपा एमालेका अध्यक्ष केपी शर्मा ओली सबैभन्दा ढिलो पुगे । प्रधानमन्त्री पुष्पकमल दाहाल प्रचण्ड र नेपाली कांग्रेसका सभापति शेरबहादुर देउवा फर्किएपछि उनी पुगेका थिए ।

त्यसैगरी उद्योगी व्यवसायीहरू पनि रास्वपा केन्द्रीय कार्यालय चा:मती पुगेका थिए ।

चियापान कार्यक्रमपछि रास्वपा सभापति रवि लामिछानेले जनताको अपेक्षा पूरा गर्नका लागि इमान्दार कोसिस गरिरहने बताए ।

२१ सिटले सरकारमा सहभागिता जनाउँदा निकै राम्रोसँग सरकार चलाउने अवस्था देखिएको पनि उल्लेख गरेका छन् ।

लामिछानेले अरु पार्टी र आफ्नो पार्टीको फरक भएको आधार तयार भए पनि वास्तविक रुपमा जनतामाझ देखाउन बाँकी रहेको धारणा चियापानपछि पत्रकारहरूसँग राखे ।