काठमाडौं– भजन शिरोमणि भक्तराज आचार्यको ‘बायोपिक’ ‘आचार्य’ असार ७ देखि पुनःप्रदर्शन हुँदैछ । उनको निधनपछिका केही दृश्य समेटेर उक्त फिल्म पुनः प्रदर्शन गर्न लागिएको हो ।

फिल्मको प्रिमियर बुधबार साँझ कमलपोखरीस्थित एक हलमा गरिएको थियो । उक्त समारोहमा फिल्मका मुख्य कलाकार एवम् भक्तराजका जेठा छोरा सत्यराजले लगाएको ‘इटालियन क्याप’ को चर्चा भयो । यो कुराले सत्यराजको मात्रै नभएर प्रिमियरमा उपस्थित अथितिकासमेत आँखा रसाए ।

प्रिमियरअघिको सानो औपचारिक कार्यक्रमका सहजकर्ता भुपेन्द्र खड्कालाई सत्यराजले लगाएको ‘इटालियन क्याप’सँग आफ्नो स्मृति छ जस्तो लागेछ । त्यही भएर उनले उक्त टोपीको चर्चा गरे ।

खड्का सञ्चारकर्ममा रहँदा भक्तराजसँगको बाक्लो भेटका कारण उनले उक्त टोपी बिर्सिएका रहेनछन् । उनकै स्मृतिमा भएको भक्तराजको टोपी सत्यराजले प्रिमियरमा लगाएर आएका रहेछन् ।

भूपेन्द्रले सत्यराजलाई प्रश्न गरे, ‘यो त बुवाको टोपी होइन र ?’ सत्यराजले ‘हो’ भने । सायद स्वर्गीय बुवाको यादले होला उनी भावुक बने । सधैँ हँसिलो देखिने उनको मुहार मलिलो भयो ।

बुवाले प्रयोग गरेको टोपी विशेष समारोहमा लगाएका थिए । यसले सत्यराजको बुवाप्रतिको प्रेम देखाएको थियो । यो दृश्यका कारण धेरै अथितिले आँशु रोक्न सकेनन् । केहीबेर हलको माहोल सुनसान भयो ।