साना– यमनमा सक्रिय लडाकु समूह हुथीले साउदी अरबको तेलखानीमा ड्रोन आक्रमण गरेको दाबी गरेका छन् । हुथी विद्रोहीसम्बद्ध अल मशिरा टेलिभिजनले साउदी अरबको पूर्वमा रहेको सयबाह तेलखानीलाई लक्षित गरी चालकरहित विमान ड्रोनमार्फत आक्रमण गरेको दाबी गरेको हो ।

अल मशिराले हुथी लडाकु सैन्य कमाण्डरलाई उद्धृत गर्दै सयबाह तेलखानीको तेल प्रशोधन केन्द्र तथा तेल भण्डारण कक्षलाई निशाना बनाइएको जनाएको छ । यद्यपि कुन मिति वा समयमा आक्रमण गरिएको भन्नेबारे केही खुलाइएको छैन ।

साउदी अरबले सयबाह तेल खानीमा गराइएको आक्रमणमा सामान्य क्षति भएर आगलागी भएको र यसलाई केही बेरमै निभाइएको जनाएको छ । साउदी अरबको राज्यसञ्चालित कम्पनी आराम्कोको प्रशासनमा रहेको सयबाह तेल खानी संयुक्त अरब इमिरेट्स यूएईसँगको सीमामा पर्छ । यो साउदी अरबको प्रमुख तेलखानीमध्येमा पर्छ ।

हुथी लडाकुले साउदी अरबको पूर्वाधारलाई लक्षित गरी बेलाबेला ड्रोन तथा क्षेप्यास्त्र आक्रमण गर्दै आएको छ ।