काठमाडौं- नेपाली कांग्रेसका सांसद रामहरि खतिवडाले पूर्वराष्ट्रपति विद्यादेवी भण्डारीले एमालेको सदस्यता नवीकरण गरेको प्रसंग संसद्‍मा उठाएका छन् ।

बुधवारको प्रतिनिधिसभा बैठकमा बोल्दै उनले पूर्वराष्ट्रपति भण्डारीले एमालेको पार्टी सदस्यता नवीकरण गरेको कुरा उठाएका हुन् ।

‘पूर्वराष्ट्रपतिले एउटा पार्टीको सदस्यता नवीकरण गरेको कुरा आयो। सदस्यता नवीकरण गरेको हो भने पूर्वराष्ट्रपतिको हैसियतमा सुविधा लिन मिल्छ मिल्दैन ?,’ खतिवडाले भने, ‘राज्यले त्यसबारे के सोचेको छ ? सरकारले त्यसको जवाफ देओस्।’

संविधानमा भएको व्यवस्थाबमोजिम सरकारले जवाफ दिनुपर्ने पनि खतिवडाले माग गरे।

सांसद खतिवडाले धितोपत्र बोर्डको अध्यक्ष नियुक्तिमा भइरहेको चर्चाबारे पनि संसद्मा उठाएका छन्।

‘अध्यक्ष नियुक्ति गर्न सत्तारुढ दलमा रस्साकस्सी चालेको छ । कानुनी प्रक्रिया नपुर्‍याइ नियुक्ति अगाडि बढाइयो भन्ने आएको छ। कानुन पालन गर्ने पद्धतिको विकास होस,’ उनले भने।