काठमाडौं– गत वर्षको तुलनामा २०८१ जेठ महिनामा घरजग्गाको कारोबार केही बढेको छ । गत वर्ष २०८० जेठ महिनामा ५५ हजार ७९ घरजग्गाको लिखत पास भएकोमा २०८१ जेठसम्म ६१ हजार १६१ वटा घरजग्गा र ३० वटा अपार्टमेन्टको लिखत पास भएको भूमि व्यवस्था तथा अभिलेख विभागले जनाएको छ । 

अघिल्लो वर्षको जेठको तुलनामा यो वर्षको जेठमा ६ हजारभन्दा बढी घरजग्गाको लिखत पास भएका हुन् । विभागकाअनुसार २०८० बैशाखमा ४९ हजार ७८२ वटा लिखत पारित भए भने २८ वटा अपार्टमेन्टको लिखत पारित भए । 

विभागको मासिक कारोबार हेर्दा, चालु आर्थिक वर्षको साउनदेखि जेठसम्म आइपुग्दा घरजग्गाको कारोबार क्रमशः बढ्दै गएको देखिन्छ । २०८० साउन महिना देखि कात्तिक महिनासम्म घरजग्गाको कारोबार ह्वात्तै घटेको देखिन्छ । २०८० साउन महिनामा ३९ हजार २६२ वटा घरजग्गा तथा २९ वटा अपार्टमेन्ट, भदौ महिनामा ३५ हजार ६८६ वटा घरजग्गा तथा ४५ वटा अपार्टमेन्ट, असोज महिनामा ३९ हजार ८८१ वटा घरजग्गा तथा ३८ वटा अपार्टमेन्ट, कात्तिक महिनामा २६ हजार ४६ वटा घरजग्गा तथा २२ वटा अपार्टमेन्टको लिखत पारित भएको देखिन्छ । 

त्यस्तै, मंसिर महिनापछि भने घरजग्गाको कारोबार विस्तारै बढ्न थालको छ । त्यस्तै, २०८० मंसिर महिनामा ४१ हजार ८५१ वटा घरजग्गा तथा २२ वटा अपार्टमेन्ट, पुस महिनामा ४५ हजार २७५ वटा घरजग्गा तथा २८ वटा अपार्टमेन्ट, माघ महिनामा ५० हजार ९२१ वटा घरजग्गा तथा २५ वटा अपार्टमेन्ट, फागुन महिनामा ५० हजार ९९८ वटा घरजग्गा तथा २९ वटा अपार्टमेन्ट, चैत महिनामा ५० हजार २५२ वटा घरजग्गा तथा १८ वटा अपार्टमेन्ट र बैशाख महिनामा ४९ हजार ७८२ वटा घरजग्गा तथा २८ वटा अपार्टमेन्ट लिखत पारित भएको देखिन्छ ।

घरजग्गाको कारोबार बढेसँगै सेवा कर र पुँजीगत लाभकर पनि बढेको छ । २०८० जेठमा सेवा करबापत २८ करोड ४० हजार रुपैयाँ र पुँजीगत लाभकरबाट १ अर्ब २८ करोड ८ लाख ८४ हजार रुपैयाँ संकलन भएको थियो भने २०८१ जेठ महिनामा सेवा करबापत ३२ करोड ३८ हजार रुपैयाँ र पुँजीगत लाभकर १ अर्ब ५६ करोड ८८ लाख ८७ हजार रुपैयाँ संकलन भएको विभागले जनाएको छ ।

चालु आर्थिक वर्ष २०८०-०८१ को साउन महिना देखि असोजसम्म सेवा कर र पुँजीगत लाभ करबापत आम्दानी केही बढेको देखिन्छ । 

साउन महिनामा सेवा करबापत २१ करोड ६६ लाख रुपैयाँ र पुँजीगत लाभकरबापत १ अर्ब एक करोड ३१ लाख रुपैयाँ, भदौ महिनामा सेवा करबापत २५ करोड ५५ लाख रुपैयाँ तथा पुँजीगत लाभकरबापत १ अर्ब ९ करोड २९ लाख रुपैयाँ र असोज महिनामा सेवा करबापत ३७ करोड ५ लाख रुपैयाँ र पुँजीगत लाभ करबापत १ अर्ब ४६ करोड ९५ लाख रुपैयाँ संकलन भएको छ ।

त्यस्तै, कात्तिक महिनामा सेवा करबापत २० करोड १५ लाख रुपैयाँ र पुँजीगत लाभ करबापत ७७ करोड ९ लाख रुपैयाँ, मंसिर महिनामा सेवा करबापत २२ करोड ३१ लाख रुपैयाँ र पुँजीगत लाभ करबापत ९६ करोड ४५ लाख रुपैयाँ, पुस महिनामा सेवा करबापत २६ करोड २० लाख रुपैयाँ र पुँजीगत लाभ करबापत १ अर्ब १० करोड ९ लाख रुपैयाँ सरकारले आम्दानी गरेको थियो । 

माघ महिनामा सेवा करबापत २२ करोड ५१ लाख रुपैयाँ र पुँजीगत लाभ करबापत १ अर्ब १९ करोड ९६ लाख रुपैयाँ, फागुन महिनामा सेवा करबापत २५ करोड ६५ लाख रुपैयाँ र पुँजीगत लाभ करबापत १ अर्ब २८ करोड ५० लाख रुपैयाँ, चैत महिनामा सेवा करबापत ३१ करोड ५२ लाख रुपैयाँ र पुँजीगत लाभ करबापत १ अर्ब ४६ करोड ९१ लाख रुपैयाँ र वैशाख महिनामा सेवा करबापत २४ करोड १४ लाख रुपैयाँ र पुँजीगत लाभ करबापत १ अर्ब ३९ करोड ९० लाख रुपैयाँ संकलन भएको विभागले जनाएको छ ।