काठमाडौं- काठमाडौं उपत्यकामा पेट्रोल र डिजलको अभाव देखिएको छ । शनिबारदेखि ट्याकंर चालकहरू आन्दोलित भएर डिपोबाट तेल नउठाउँदा हाहाकार भएको हो ।

विभिन्न माग राख्दै पेट्रोलियम ढुवानी मजदुरले गरेको आन्दोलनका कारण उपत्यकामा पेट्रोल डिजलको अभाव देखिएको हो ।

सोमबार मौज्दात रहेका पेट्रोलपम्पमा पेट्रोल-डिजल भर्नेहरूको लामो लाइन लागेको थियो । सेना, प्रहरी, सशस्त्र तथा साझा पम्पमासमेत उपभोक्ताको लामो लाइन थियो ।

सोमबार मध्यान्हपछि मौज्दात सकिएको भन्दै अधिकांश पेट्रोल पम्पहरू बन्द भएका छन् । भद्रकालीस्थित नेपाली सेनाको रिपुमर्दिनी पेट्रोल पम्पमा पनि तेल सकिएको छ ।

पेट्रोलियम सकिएपछि छैन लेखिएको बोर्ड सेनाले झुन्ड्याइसकेको छ । सेनाको पम्प रित्तिएपछि त्यहाँ लाइनमा रहेका सयौँ उपभोक्तालाई समस्या भएको छ ।

शनिबारदेखि नै ट्यांकर चालकले विभिन्न माग राखेर आन्दोलन गरिरहेका छन् । चालकले पेट्रोलियम पदार्थ बोक्ने ट्यांकर नचलाएका कारण पेट्रोलियम पदार्थको अभाव भएको हो ।

सोमबार अधिकांश पम्प बन्द थिए । यस्तोमा नेपाली सेना, साझा, नेपाल प्रहरी र सशस्त्र प्रहरीका पम्पबाट मात्रै इन्धन वितरण भइरहेको थियो ।