एजेन्सी– आतंकवादी सञ्जालमा आबद्ध रहेको तथा तस्करीमा संलग्न रहेको अभियोगमा बाल्कन मुलुक बोस्निया एण्ड हर्जगोभिनामा ६ अफगान आप्रवासी पक्राउ परेका छन् ।

मंगलबार विज्ञप्ति जारी गर्दै बोस्निया एण्ड हर्जगोभिनाको विदेशी मामिला सेवाले यस वर्षको सुरुबाट हालसम्म आतंकवादी सञ्जालमा आबद्ध रहेको तथा तस्करी र सांगठनिक अपराधमा संलग्न रहेको अभियोगमा ६ अफगान आप्रवासीलाई पक्राउ गरिएको जनाएको हो ।
आतंकवादी सञ्जालमा आबद्ध रहेको अभियोगमा ५ जना पक्राउ परेका हुन् भने अर्का एकजना तस्करी तथा सांगठनिक अपराधमा संलग्न रहेको अभियोगमा पक्राउ परेका हुन् ।

उनीहरु सबैलाई राजधानी सेरायेभोबाट पक्राउ गरिएको जनाइएको छ । छिमेकी मुलुकहरु स्लोभेनिया तथा हंगेरीले सीमामा कडाई गरेपछि बोस्निया एण्ड हर्जगोभिनामा ठूलो सङ्ख्यामा दक्षिण एशिया तथा मध्यपूर्वका आप्रवासीहरु बस्दै आएका छन् ।