काठमाडौं – नायिका प्रियंका कार्की मुख्य कलाकारमध्ये एक रहेको ‘वेब सिरिज’ प्रसारणको अन्तिम तयारीमा छ । यो सिरिजको छायांकन तीन वर्षपहिलादेखि सुरु भएको हो ।

सिरिजको छायांकनमा सुरुवात गर्दा प्रियंकाले छोरीलाई जन्म दिएको सात महिना मात्रै भएको थियो । प्रियंकाकाअनुसार सुत्केरी भएपछिको यो पहिलो काम हो । त्यहीकारण पनि यस कामलाई उनले विशेष ठानेकी छन् ।

छोरीलाई स्तनपानका लागि समय छुट्याउँदै छायांकन गरेकाले यो काम विशेष रहेको उनले सुनाइन् ।

ठमेलमा सोमबार सिरिजको टिजर सार्वजनिक कार्यक्रममा उनले सुत्केरीपछि तौल बढेकाले सिरिजमा फिट देखिन गृहकार्यसमेत गरेको बताइन् ।

‘म त काम गर्न सक्छु भन्ने लाग्थ्यो तर शरीर कमजोर हुने रहेछ । छिटो गलिने रहेछ’, सुत्केरीपछिको सुटिङ अनुभवबारे उनले सेयर गरिन् ।

सुत्केरी हुँदा मोटाएको शरीर घटाएको असर यो सिरिजमा देखिने उनले जानकारी दिइन् । आफ्नो अंशको सुटिङ निरन्तर नहुने प्राविधिक कारणले दर्शकले थाहा पाउने गरी पर्दामा तौल घटबढ देखिने उनको भनाइ छ ।

‘सुरुमा अनुबन्ध हुँदा मेरो तौल ८८ केजी थियो, अन्त्यतिर म ६० केजी पुगेँ । पर्दामा देखिने जस्तो निरन्तर सुटिङ हुँदैन । पहिलो सिन पछि र पछिको सिन पहिला खिचिएको हुन्छ,’ उनले स्पष्ट पारिन्, ‘एकबाट अर्को सिन परिवर्तन हुँदा म पर्दामा मोटोबाट पातलो देखिन्छु । दर्शकले याद नै गर्नुहुन्छ ।’

सुत्केरीपछि तौल घटाउने क्रममा उनले यो सिरिजमा काम गरेकी हुन् । उनी हरेक पटक छायांकनस्थलमा जाँदा दुब्लो देखिएपछि निर्देशक सुजोय योङले भन्थे रे, ‘अरे फेरि दुब्लो भयौँ ।’

‘एक्सन क्राइम’ जनरमा बनेको यो सिरजमा साउन अन्तिमबाट प्रसारणमा ल्याउने योजना निर्माण पक्ष रहेको छ । यद्यपि उनीहरुले प्रसारण मिति भनेको तोकेका छैनन् ।

३८० भन्दाबढी कलाकारको अभिनय रहेको वेबसिरिज ‘साहु बा’को टिजर सार्वजनिक