काठमाडौं– आईसीसी टी–२० विश्वकप खेल्नका लागि क्रिकेटर सन्दीप लामिछाने वेस्ट इन्डिज पुगेका छन् ।
लामिछानेले वेस्ट इन्डिज पुगेर सामाजिक सञ्जालमार्फत विश्वकप खेल्ने आफ्नो सपना पूरा भएको उल्लेख गरेका छन् ।
उनले क्यान अध्यक्ष चतुरबहादुर चन्द, सचिव पारस खड्का, वकिल सरोज कृष्ण घिमिरे तथा म्यानेजर विनोद दासलगायतको निरन्तरको प्रयासले वेस्ट इन्डिजमा हुने दुई खेलमा भने सहभागिता जनाउने अवसर पाएको भन्दै सबैमा धन्यवाद व्यक्त गरेका छन् ।
उनले भनेका छन्– ‘म अब बाँकी दुई खेलका राष्ट्रिय टिमसँग वेस्ट इन्डिजमा रहने छु। मेरो सपना र समर्थकहरूको सपना पूरा हुँदैछ।’
अमेरिकी भिसा प्रक्रियाका लागि सरकार, राष्ट्रिय खेलकुद परिषद, क्यानलगायतले प्रयास गरेको भएपनि भिसा नपाएको उनले बताएका छन् ।
उनले झुटा हल्ला र अफवाहाका पछि नलागी १० वर्षपछि विश्वकप खेलिरहेको नेपाललाई निरन्तर हौसला बढाउन सबैमा आग्रह गरेका छन्।
सन्दीपले वेस्ट इन्डिजमा हुने दक्षिण अफ्रिका र बंगलादेशसँगको खेल खेल्नेछन् । नेपालले आगामी शनिबार दक्षिण अफ्रिका र सोमबार बंगलादेशसँग खेल्दैछ ।
प्रतिक्रिया