काठमाडौं– सरकारले वैशाख महिनामा मात्रै ५ वटा मन्त्रालयको साढे २ अर्ब बढी बजेट रकमान्तर गरेको छ । अर्थ मन्त्रालयले सार्वजनिक गरेको सूचनाअनुसार वैशाख महिनामा ऊर्जा, भौतिक, रक्षा, सहरी र स्वास्थ्य मन्त्रालयको २ अर्ब ४० करोड ६ लाख ९६ हजार रुपैयाँ रकमान्तर भएको हो ।

अर्थ मन्त्रालयकाअनुसार सो अवधिमा ऊर्जा, जलस्रोत तथा सिँचाइ मन्त्रालयका ९, भौतिक पूर्वाधार तथा यातायात मन्त्रालयका ६, रक्षा मन्त्रालयका ३, सहरी विकास मन्त्रालयका ११ र स्वास्थ्य तथा जनसंख्या मन्त्रालयको १ वटा शीर्षकबाट अर्को कार्यक्रम शीर्षकमा रकमान्तर गरिएको छ ।

त्यस्तै, अर्थ मन्त्रालयले वैशाख महिनामा संघीय संसद्, अदालत, निर्वाचन आयोग, राष्ट्रिय मानवअधिकार आयोग, अर्थ मन्त्रालय, ऊर्जा, जलस्रोत तथा सिँचाइ मन्त्रालय, गृह मन्त्रालय, वन तथा वातावरण मन्त्रालय, भौतिक पूर्वाधार तथा यातायात मन्त्रालय, शिक्षा विज्ञान तथा प्रविधि मन्त्रालय र परराष्ट्र मन्त्रालयलाई २ अर्ब ८३ करोड ९६ लाख ४६ हजार रुपैयाँ थप बजेट निकासा गरेको छ ।