रुपन्देही– प्रदेश नं ५ प्रदेशसभामा नेपाल कम्युनिष्ट पार्टी (नेकपा)का प्रमुख सचेतक भूमिश्वर ढकालको घरमा विहीबार राति अज्ञात समूहबाट आक्रमणको प्रयास भएको छ ।

प्रमुख सचेतक ढकालको घरमा आक्रमणको प्रयास गर्दै अज्ञात समूहले त्यहाँ राखिएको लु १ प ४५६ नम्बरको सरकारी गाडीको सिसा तोडफोड गर्नुका साथै आगजनी गरेको इलाका प्रहरी कार्यालय सालझण्डीका प्रहरी निरीक्षक रविनराज मैनालीले जानकारी दिए ।

राति करीब २ः३० बजेको समयमा मोटरसाइलमा आएको समूहले आगजनी गरको प्रहरीले जनाएको छ ।

‘नेता ढकाल केही दिनदेखि काठमाडौँस्थित मेडिसिटी अस्पताल भर्ना हुनुभएको छ । सैनामैना–८ रामापुर कलौनीस्थित ढकालको घरमा पत्नी, बुबा–आमालगायत हुनुहुन्छ ।’, जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक धर्मराज भण्डारीले भने, ‘नेता ढकालको घरमा राति अज्ञात समूहले आक्रमण गरेको हो ।’

गाडी तोडफोड गर्ने समूहको खोजी जारी रहेको प्रहरीले जनाएको छ ।