जनकपुरधाम । मधेश प्रदेशमा दलहरुबीच सहमति नजुट्दा मुख्यमन्त्रीमा दाबी पेश गर्न ढिलाइ भएको छ ।

नेकपा एमाले, माओवादी र एकीकृत समाजवादी जनमत पार्टीको नेतृत्वमा सरकार बनाउन सहमत भइसकेका छन् । तर मन्त्रालय भागबण्डाको विषयमा उनीहरूबीच कुरा मिल्न सकेको छैन् ।

जनमत पार्टीले प्रदेश सांसद सतिश सिंहलाई मुख्यमन्त्री बनाउने निर्णय गरिसकेको छ । मन्त्रालय भागबण्डाका विषयमा बिहीबार बिहान ११ बजेदेखि दलहरुबीच भइरहेको छलफल अझै सम्म निष्कर्षमा पुगेको छैन । भागबण्डाका विषयमा अहिले मधेश भवनमा छलफल भईरहेको छ ।

बैठकमा सहभागी एक नेताका अनुसार नेकपा एकीकृत समाजवादीले तीनवटा मन्त्रालयमा दाबी गरेपछि कुरा मिल्न नसकेको हो ।

आजै अबेर रातिसम्म भए पनि मुख्यमन्त्रीमा दाबी पेश गर्ने दलहरुको तयारी छ ।