काठमाडौं– ठगी तथा विश्वास घातसम्बन्धी मुद्दामा निर्देशक सुदर्शन थापा पक्राउ परेका छन् । थापा पक्राउ परेसँगै निर्माणाधीन चलचित्र ‘रावायण’को सुटिङ पनि रोकिएको छ ।

थापालाई सोमबार मालीगाउँबाट पक्राउ गरिएको जिल्ला प्रहरी परिसर काठमाडौंका प्रवक्ता एसपी नवराज अधिकारीले बताए ।

उनलाई ठगी तथा आपराधिक विश्वासघातसम्बन्धी कसुरमा मुद्दा अघि बढाउन अहिले बौद्ध प्रहरी बृत्तमा लगिँदैछ ।

चलचित्र ‘प्रसाद–२’ का निर्माता सुदर्शन बस्नेतले थापाविरुद्ध गत भदौमा प्रहरी बृत्त बौद्धमा विश्वासघातसम्बन्धी कसुरमा उजुरी दिएका थिए ।

निर्माता बस्नेतका अनुसार निर्देशक थापाले आफ्नो अनुमतिबिना विभिन्न देशमा ‘प्रसाद-२’ प्रदर्शन गरेका थिए ।

उनले खबरहबसँग भने, ‘सम्पादनका क्रममा एक कपी उम्काएका रहेछन् । मेरो अनुमतिबना त्यसलाई विदेशमा प्रदर्शन गरेपछि कानुनी उपचार खोजेको हुँ ।’

थापा पक्राउ पर्नुअघिसम्म ‘रावायण’को दोस्रो चरणको सुटिङ काठमाडौंमा जारी थियो । उनलाई प्रहरीले छायांकनस्थलबाटै पक्राउ गरेको हो ।

यस फिल्ममा नायक पल शाह र नायिका पूजा शर्मा मुख्य भूमिकामा छन् । यस फिल्मका निर्माता नायिका शर्मा र निर्देशक थापा हुन् ।