काठमाडौं – प्रमुख प्रतिपक्षी नेपाली कांग्रेसका सभापति शेरबहादुर देउवाले प्रतिपक्षी दलका नेताहरूसँग बैठक गरेका छन् ।

बूढानीलकण्ठमा भएको प्रतिपक्षी दलहरूको बैठकमा सत्तारुढ नेकपा एकीकृत समाजवादीका अध्यक्ष माधवकुमार नेपाल पनि सहभागी भएका छन् । उनी सांसद मेटमणि चौधरीलाई लिएर बूढानीलकण्ठ पुगेका थिए ।

बूढानीलकण्ठमा भएको प्रतिपक्षी दलहरूको बैठकबाट जनता समाजवादी पार्टीका अध्यक्ष उपेन्द्र यादव १० मिनेट अगाडि निस्किए ।

त्यसपछि लोकतान्त्रिक समाजवादीका अध्यक्ष महन्थ ठाकुर र नेकपा एसका अध्यक्ष नेपाल एकसाथ बूढानीलकण्ठबाट बाहिरिएका छन् ।

मंगलबार आगामी आर्थिक वर्षको बजेट संसद्‍मा पेश भइसकेको अवस्थामा देउवाले प्रतिपक्षी दल नेताहरूलाई बोलाएका थिए ।

देउवा निवासमा भएको प्रतिपक्षी दलको बैठकमा भएको कुराकानीबारे दुवै पक्षले केही खुलाएका छैनन् । बूढानीलकण्ठ वार्तामा वर्तमान राजनीतिक अवस्था र मधेश सरकार गठनबारे छलफल भएको बताइएको छ ।

पछिल्लो समय माधव नेपाल सत्ता समीकरणसँग असन्तुष्ट रहेका विवरण आइरहेका छन् । यस्तोमा देउवासँग प्रतिपक्षी नेताहरूसहित नेपाल पनि सहभागी हुनुलाई अर्थपूर्ण भनिएको छ ।