काठमाडौं- अर्थमन्त्री वर्षमान पुनले निकै मिहिनेतसाथ रातभर नसुतेर बजेट निर्माण गरेको बताएका छन् ।

मंगलबार संसद्मा प्रस्तुत गरिएको बजेटमा आएको प्रतिक्रियाले खुशी भएको पनि उनले बुधबार गरेको पत्रकार सम्मेलनमा बताएका छन् ।

‘म बिहा ३ बजेसम्म यहीँ (मन्त्रालयमै) थिएँ । बिहानपख गएर एकछिन सुतेर बजेट प्रस्तुत गर्ने तयारीमा लागेको हुँ, सचिवहरु यहीँ घरबाट ल्याएको म्याट्रेसमा सुत्नुभएको रहेछ’, उनले भने, ‘निजी क्षेत्र र प्रतिपक्षी दलको प्रतिक्रिया हेर्दा यो बजेट सन्तुलित आएछ भन्ने सुन्न पाउँदा हामी खुशी छौँ ।’

अर्थमन्त्री पुनले केही प्राविधिक कमजोरी रहे पनि बजेट वस्तुपरक बनाउन सफल भएको बताए ।

‘हामीले करका दर हेरफेर गर्दा तीन महले बनाएर गर्छौं भनेका थियौँ, केही प्राविधिक कमजोरी हुनसक्छ, केही कुराबाहेक तपाईंहरूसँग ढुक्कले कुराकानी गर्नसक्ने अवस्थामा छौँ’, उनले भने, ‘निश्चय पनि हामी निकै दबाबमा थियौँ । गतवर्षका प्रक्षेपण मिलिरहेका थिएनन् र छैनन् । त्यसैले कसरी बजेटलाई वस्तुपरक बनाउने भन्नेमा मेरो जोड थियो ।’

बजेटले व्यवसायी र उद्यमीमा आशा जगाउने प्रयत्न गरेको उनले बताए । पुनले नेपालको भौगोलिक अवस्थितिअनुसारको के कुरामा देशलाई प्रतिस्पर्धी बनाउन सकिन्छ भनेर खोजी गरेको बताएका छन् ।
उनले अहिलेसम्मको आर्थिक सुधारका क्रममा भएका कमजोरीको हल गर्न उच्चस्तरीय आयोग बनाएर त्यसको सुझावका आधारमा अगाडि बढ्ने बताए ।