काठमाडौं– सहकारी ठगी प्रकरण छानबिनका लागि गठन गरिने संसदीय समितिको कार्यादेश निर्धारण गर्न गठित कार्यदल बैठकमा सहमति जुट्न नसकेपछि प्रधानमन्त्रीले सत्तापक्ष र प्रतिपक्षी दुबैसँग बालुवाटारमा छलफल गरिरहेका छन् ।
कार्यादेश निर्धारण गर्न गठित कार्यदल बैठक कानून मन्त्रालयमा बसेको थियो तर सहमति हुन नसकेपछि प्रधानमन्त्रीले कांग्रेस र सत्ता पक्षका शीर्ष नेतासँग बालुवाटारमा छलफल गरिरहेको कानून मन्त्री पदम गिरीले बताए ।
‘संसदीय छानबिन समितिको कार्यादेश टीओआर टुङ्गो लगाउन प्रधानमन्त्रीले पहल गर्छु भन्नु भएको छ’ कांग्रेस प्रमुख सचेतक रमेश लेखकले खबरहबलाई भने, ‘प्रधानमन्त्रीले बोलाउनु भयो र हामी आएका छौँ ।
कार्यदलको बैठकमा सहकारी र कम्पनीको नाम उल्लेख गरौँ, तर गृहमन्त्री रवि लामिछाने व्यक्तिमा नजाऔँ भन्ने सत्ता पक्षको अडान थियो ।
तर कांग्रेसले भने व्यक्तिमा नगएपनि रविको नाम जोडिएर चार सहकारीको नाम उल्लेख गर्नुपर्ने अडान राखेको छ ।
यसका सहमति नजुटेपछि शीर्ष नेताहरूबिच छलफल गरेर सहमति जुटाउन प्रधानमन्त्रीले पहल गरेको प्रधानमन्त्रीको सचिवालयको भनाइ छ ।
प्रधानमन्त्रीसँगको बैठकमा कार्यदलका कानूनमन्त्री गिरी, कांग्रेस सहमहामन्त्री जीवन परियार, संसद् ज्ञानेन्द्रबहादुर कार्की, एमाले प्रमुख सचेतक महेश बर्तौला र रास्वपाबाट शिशिर खनाल पिन सहिभाग छन् ।
कांग्रेसबाट उपसभापति पूर्णबहादुर खड्का, महामन्त्री गगन थापा, प्रमुख सचेतक रमेश लेखक, नेता कृष्ण सिटौला सहभागी छन् ।
यस्तै सत्ता पक्षबाट एमालेबाट उपप्रधान तथा भौतिक पूर्वधानमन्त्री रघुवीर महासेठ,सांसद विष्णु पौडेल सहभागी छन् । यस्तै, माओवादीबाट अर्थमन्त्री वर्षमान पुन र प्रमुख सचेतक हितराज पाण्डे सहभागी छन् ।
बैठकमा एमाले अध्यक्ष केपी ओली र कांग्रेस सभापति शेरबहादुर देउवा सहभागी छैनन् । देउवालाई सन्चो नभएको बताइएको छ भने ओलीले पौडेल र महासेठलगायतलाई पठाएका छन् ।
प्रतिक्रिया