काठमाडौं– भनिन्छ, नेपाल कृषि प्रधान देश हो । शायद यही भएर होला, प्रधानमन्त्री र मन्त्रीहरूको सम्पत्ति विवरण सम्बन्धी फारमको तेस्रो नम्बर बुँदामा ‘कृषि तथा पशुधन’ सम्बन्धी विवरण भर्नुपर्ने प्रावधान राखिएको छ । 

मंगलबार सार्वजनिक भएको मन्त्रीहरूको सम्पत्ति विवरणमा हामीले कुन मन्त्रीसँग के-के पशुधन रहेछ भनेर हेर्‍यौं । फारममा ‘कृषि तथा पशुधन’ को प्रावधान रहे पनि एकजना बाहेक सबै मन्त्रीसँग एउटा पनि पशुधन नरहेको पाइयो । स्वयं कृषिमन्त्री ज्वालाकुमारी साहसँग पनि पशुधन छैन । 

सबैभन्दा बढी पशुपालन गर्ने मन्त्री रहेछन् खानेपानी मन्त्री राजेन्द्रकुमार राई । धनकुटाबाट निर्वाचित सांसद राईले ७ वटा गाई र ३० वटा बाख्रा पालेका रहेछन् । 

मन्त्री राईको बैंकखातामा एक पैसा नरहे पनि तिर्नुपर्ने ऋणचाहिँ ५५ लाख रुपैयाँ छ । उनले पाख्रिबासका रामकुमार राईलाई २० लाख रुपैयाँ र राष्ट्रिय वाणिज्य बैंकलाई २५ लाख रुपैयाँ तिर्नुपर्ने सम्पत्ति विवरणमा उल्लेख छ । 

मन्त्रीहरूसँग पशुधन नरहे पनि सुनचाँदी चाहिँ प्राय सबै मन्त्रीसँग पाइएको छ । गृहमन्त्री रवि लामिछानेको परिवारसँग ८० तोला सुन रहेछ भने मन्त्री भगवती चौधरीसँग ८५ तोला सुन रहेको पाइएको छ । भौतिक पूर्वाधार मन्त्री रघुवीर महासेठसँग ४३ तोला सुन रहेछ भने शहरी विकासमन्त्री धनबहादुर बूढासँग १५० तोला सुन रहेको पाइएको छ । 

त्यसैगरी विभिन्न बैंक र कम्पनीहरूमा सेयर खरीद गर्ने कार्यमा पनि मन्त्रीहरू अग्रपङ्क्तिमा देखिएका छन् ।