काठमाडौं- उपप्रधान तथा परराष्ट्रमन्त्री नारायणकाजी श्रेष्ठले सम्पत्ति विवरण सार्वजनिक गरेका छन् ।

मंगलबार सार्वजनिक भएको सम्पत्ति विवरणअनुसार नेकपा माओवादी केन्द्रका वरिष्ठ उपाध्यक्षसमेत रहेका श्रेष्ठसँग संघीय राजधानी काठमाडौंमा घर छैन ।

उनी अहिले ललितपुरस्थित सरकारी निवासमा बस्छन् । मन्त्री नभएका बेला उनको बास भाडाको घरमा हुने गरेको छ ।

श्रेष्ठका अनुसार गृहजिल्ला गोरखाको सिराञ्चोक गाउँपालिका-८ मा पैत्रिक सम्पत्तिका रुपमा रहेको ३१ रोपनी १५ आना १ पैसा एक कित्ता, १ रोपनी १० आना १ पैसा १ दाम अर्को कित्ता र ५ रोपनी ७ आना ३ पैसा ३ दाम अर्को कित्ता जग्गा रहेको छ ।

त्यो सबै सम्पत्ति पनि आफूले २०५८ सालमा पार्टीलाई हस्तान्तरण गर्ने घोषणाअनुसार प्रक्रियामा रहेको उनले जनाएका छन् ।

उनीसँग राष्ट्रिय वाणिज्य बैंकको सिंहदरबार शाखाको खातामा १ लाख २२ हजार ९१८ रुपैयाँ ६४ पैसा बचत रहेको सम्पत्ति विवरणमा देखाइएको छ ।

नारायणकाजीले आफूसँग कुनै किसिमको शेयर, ऋण र पशुधनसमेत नरहेको उल्लेख गरेका छन् ।

उनले अहिले आफू नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल प्रचण्डले उपलब्ध गराएको पुरानो गाडी चढिरहेको पनि जनाएका छन् ।

बा १० च ५७५९ नम्बरको उक्त गाडी आफूलाई प्रचण्डले प्रयोग गर्न दिएकाले त्यसको खरिद मूल्य र मिति दुवै थाहा नभएको पनि श्रेष्ठले जनाएका छन् ।